कविता :-तिमि मेरो बिक्रेता


तिमि मेरो बिक्रेता

तिमि मेरो बिक्रेता आशुको,
मन, मुटु,चेतना र आवेगको,
वा शीत जस्तो मुस्कानको 
अथवा हुनसक्छ समग्र जीवनको,
बिक्रेता तिमी.

म संग बेच्नका लागि निरोको बासुरी थिएन,
सिकन्दरको साम्राज्य,
वा हिटलरको जस्तो  तरङ्ग पनि थिएन,
न  त सल्लेरीको धुन बोकेर हिड्ने 
हुलकाहुल चराहरु थिए,
न त इन्द्रेणी ओढ्ने सपनाहरु थिए,
न त हाम्फाली रहने प्रेमी छहरा थियो.
न त बादल बनेर हिमाल चुम्ने सागरको समर्पण थियो,
अह! केहि थिएन मसंग.

म संग न त 
किनार संग जिस्किने लहरको बाल हासो थियो,
न त बाढीले पखाली  रहने गाउ जस्तो आखा थियो,
वा 
पहिरो गैरहने पहाड जस्तो मुटु,
वा 
हिमाल पगाल्ने मुनामदन कथा 
अह!केहि थिएन,

म संग थियो त
मेरो समग्रताको चित्र जस्तो कविता 
मात्र कविता,
 त्यहि थियो 
जो बिक्रेता मेरो  आशुको.

********************************

कविता :-धेरै हिड्नु थियो

धेरै हिड्नु थियो 

धेरै-धेरै हिड्नु थियो जिन्दगीमा,
धेरै टाढा पुग्नुथियो जिन्दगीमा 
तर खै कहा पुगेछु र?
-हिडेछु मात्रै पैतालाको आयतन भरी,
-पुगेछु मात्र आखाको सीमाना भरी. 

मलाइ छिचोल्नु थियो,
आफ्नै घाटीको भक्कानो पहाड,
 र टेक्नु थियो गुलाबी पूर्वको  क्षितिज 
मैले टिप्नु थियो थियो 
कृष्ण पक्षमा हराएको आमाको चुरा
र बाबुको ज्याकेटको बटन जस्तो 
आखाको घाम,
र आफै पनि बनाउनु थियो 
इन्द्रेणी जस्तो छानो 
वा पसिनाकै सहि
 सन्तानको स्विमिंग पुल. 


मैले खोज्नु थियो 
संगीनिको फुली जस्तो ध्रुवतारा  
सिउदोको गर्विलो गुरास
र आफ्नै मायाको अंशबन्डा गर्ने  
मेरो भावी  परिचय. 

धेरै हिड्नु थियो 
तर के हिडिदो रहेछ  र !
पेन्डुलम जस्तो घामजून भएर 
बादल ,बर्सा,खहरे र सागर जस्तो नियति भएर 
अह! कहिँ पुगीदो रहेनछ 
प्रत्येक ह्यांग ओभर पछिको पछुतो भएर,
वा अनिदो रात पछिको 
बेश्या  बिहान भएर 
अह! कहिँ पुगीदो रहेनछ 

मलाइ  माछा चराइरहेको बकुल्लो जस्तै 
संचयकोस खर्चिदै 
उगिरहनु थियो,
मलाइ अखबारको सिरानीमा 
निदाउनु र बिउझिनु थियो 
मलाइ शुभारम्भको "गणेश" 
र  दुखको बेला "राम-राम" बन्नु थियो.

तर आफ्नै मुटु भएपछी बन्चरो
आखा भएपछी बाढी,
सुस्केरा भएपछी पहिरो,
र श्वासप्रश्वास भएपछी आधी,
अह! कहिँ पुगीदो रहेनछ.

धेरै हिड्नु थियो जिन्दगीमा. 

कविता :-झरी र सम्झना

 कविता :-झरी र सम्झना 


झरी र झरीकै संगीत ,
झरी र झरीकै चिसो,
झरी र झरीकै चंचलता, 
झरी र झरीकै भूमिका, 
यस्तै बीच 
उसले यताउता हेरी
 र
खोजी
मेरो जुठो कफी.  
*****************